BUTUAN CITY – Gi-ablihan sa makadali ang mga tugpahanan sa United Arab Emirates (UAE), nga naghatag og dalan sa kapin 20-mil ka biyahero, lakip ang mga Pilipino nga mahinayon ang ilang pagbiya human ang temporaryong pagsirado sa airspace.
Sumala sa General Civil Aviation Authority, gisugdan na ang “exceptional flight operations,”apan gitambagan ang mga pasahero nga dili una moadtu sa airport hangtud wala gikontak sa ilang airline aron malikayan ang aberya.
Sigon ni Consul General Ambrosio Brian Enciso III, head sa Philippine mission in Dubai and the Northern Emirates nga “cautiously optimistic” ang Philippine Consulate sa Dubai sa pagbalik sa pipila ka mga international flights gikan sa Dubai International Airport apan padayon pa gihapong gimonitor ang paspas nga pag-usab sa sitwasyon tungod sa tensyon tali sa US-Israel ug Iran.
Sa kapin 1,000 ka Pilipinong mihangyu og repatriation, 586 ang gikan sa Dubai.
Samtang gianunsyo sa usa ka airline company sa Pilipinas ang kanselasyon sa ubang flights padulong ug gikan sa Doha, Riyadh ug Dubai sugod sa Marso 3 hangtud sa 5 og mamahimong magpa-rebook o magpa-refund ang mga apektadong pasahero.
Ang pag-abli sa UAE airspace misunod sa temporaryong pagsirado niini niadtong Marso 1 tungod sa mga pag-atake sa Iran, ug subling pagsugod sa operasyon niadtong Marso 2 sa gabi-i.
