BUTUAN CITY – Gipasabot sa International Criminal Court kon ICC ang mahitabong upat ka adlaw nga confirmation of charges hearing sa kasong crimes against humanity mahitugnod sa war on drugs ni kanhe Pangulong Rodrigo Duterte nga magsugod sa Pebrero 23.
Sigon ni ICC spokesperson Oriane Maillet nga sa nasangpit nga petsa himoon ang confirmation of charges diin tumbukon sa pre-trial judges kung dunay igong ebidensya ba batuk kang Duterte aron ipadayon ang pagdungog sa kaso.
Sa upat ka adlaw nga hearing, dunggon sa mga hukom sa pre-trial chamber 1 ang mga argumento gikan sa prosekusyon, defense ug mga abogado nga representante sa mga biktima samtang si Duterte gitugutang dili motambong sa pagdungog, base sa iyang hangyu.
Una nang gibutyag sa ICC nga wala gitugutan sa The Hague ang pagtaral nga wala ang mga akusado ugaling makumpirma ang mga kaso.
Nadeklara usab nga “fit” para moatubang sa pagdungog si Duterte apan gitugutan gihapon nga dili motambong.
Lakip sa de-kalibreng abogado ni Duterte nga moatubang sa pagdungog si British-Israeli lawyer Nicholas Kaufman, isip lead defense lawyer nga dunay 3 ka dekadang kasinatian sa ICC ug uban pang international courts; og associate defense counsel Atty. Dov Jacobs, asst. professor sa Public International Law sa Netherlands ug nagpa-acquit kang kanhe Cote d’Ivoire Président Laurent Gbagbo, sa crimes against humanity.
Si Kaufman ang parte sa defense team nga nagpadaug kang Rwandan rebel leader Callixte Mbarushimana sa lima ka counts of crimes against humanity ug 8 counts sa war crimes niadtong 2010 ug uban pang nalambigit sa crimes against humanity sa ICC sama nila Congo President Jean Piere Bemba ug kanhe Central African Republic minister Maxime Mokom.
