BUTUAN CITY – Narekober sa mga Russian authorities ang patay’ng lawas sa pito ka mga Chinese tourists ug usa ka Russian driver nga namatay human mitidlom ang ilang gisakyang mini-bus ilawom sa nag-ice nga Lake Baikal sa Siberia.
Nagpa-abot na si Irkutsk regional Governor Igor Kobzev sa iyang pahasubo ngadto sa mga kabanay ug kahigalaan sa mga biktima kondiin gikatahong usa ka Chinese tourist ang naluwas.
Nasayrang mi-abot sa 59 ka tiil ang giladmon sa dapit nga nahitabuan ug migamit pa ang mga divers og mga underwater cameras aron pagpangita sa mga biktima.
Ang Baikal – nga mao ang pinakalawom nga lawa sa tibuok kalibutan – usa ka sikat nga tourist destination.
Kanunay kining mag-freeze matag-winter season ug nakatala na og pipila ka mga aksidente sulod sa daghang mga katu-igan.
Duna na’y gihimong criminal investigation aron masuta ang hinungdan niini.
