BUTUAN CITY – Ang mental ug pisikal nga pagpangandam sa matag-deboto alang sa pakig-uban sa panaw ni Hesu Kristo mao ang tumong sa kwaresma nga magsugod pinaagi sa Miyerkules Badlis kon Ash Wednesday nga gi-obserba sa Simbahang Katoliko kagahapon.
Sa eksklusibong pakighinabi sa Bombo Radyo Butuan, gipadayag ni Fr Glenn Adam Abamonga, tigpamaba sa Diocese of Butuan nga ang Miyerkules Badlis mao ang pagsugod sa kwaresma isip pakigduyog usab kang Ginoong Hesu Kristo sa iyang mga pag-antus aron lang maluwas ang katawhan sa tibuok kalibutan gikan sa mga kasal-anan.
Kini matud pa ang rason nga 40 ka mga adlaw mulungtad ang kwaresma tungod kay 40 diyas man usab ang pagpanaw ni Hesu Kristo sa disyerto isip pagpangandam sa iyang misyon adiser mi-adto sa Herusalem nga mao na ang pagsa-ulog usab sa Semana Santa.
Giklaro usab ni Fr Abamonga nga dili kini adlaw sa obligasyon kondili makahuluganong pagsa-ulog sa mga deboto ug sama sa Biernes Santo, ang Ash Wednesday mao usab ang adlaw sa pagpu-asa kondiin ginadasig ang dili pagkaon og daghan.
Kini isip pagdisiplina sa kaugalingon ingon man sa espirituhanong panginahanglan. Pinaagi matud pa niini, ang magasto unta sa buhong nga mga butang ug mga pagkaon, matagana og mahatag ngadto sa mga tawong mas nanginahanglan.
