BUTUAN CITY – Nagduso og disciplinary complaint si Atty Mary Helen Polinar-Zafra batuk na usab kang Surigao del Sur 1st District Congressman Romeo Momo Sr kagahapon ngadto sa House Committee on Ethics and Privileges.
Sa eksklusibong pakighinabi sa Bombo Radyo Butuan, gipadayag sa Surigaonon lawyer nga mi-uban kaniya pagduso og reklamo ang Task Force Kasanag Inc – usa ka non-governmental organization.
Miduol matud pa kaniya ang maong grupo human siya nagduso og kasong plunder sa rasong oras na matud pa nga mapasakaan kini og ethics complaint ngadto sa nasangpit nga komite sa House of Representatives.
Tulo ka grounds ang gihimong basehan sa nasangpit nga reklamo nga gilangkuban sa paglapas sa ethical standards ug conflict of interest tungod sa pagpabiling chairman ni Rep Momo sa House Committee on Public Works and Highways taliwa nga board of director kini sa ilang kompanya nga Surigao La Suerte Corporation.
Dayon ang grave misconduct and conduct unbecoming to the integrity sa House of Representatives tungod kay base sa House rules, nakakomitar ang kongresista grabe nga pagbalewala sa House rules tungod sa wala niya pagbutyag sa iyang nakomitar nga conflict of interest.
Dugang pa ni Atty. Zafra, ilang giprayoridad ang pagdawat ug paghulat sa hustong proseso sa ethics complaint batok kang Cong. Momo, diin gilauman nga ipahigayon ang pormal nga imbestigasyon ug ipatuman ang angay nga disciplinary sanctions ubos sa lagda sa House Committee on Ethics and Privileges.
Nanghinaut si Zafra nga kung gisuspenso sa maong komite si Cong. Kiko Barzaga sulod sa unom ka bulan tungod sa mga aksyon nga giingong “unbecoming,” labaw nga ipatuman kini kang Congressman Momo tungod sa ilang gisukip nga mga lig-ong dokumento isip basehan sa ilang reklamo.
