BUTUAN CITY – Gi-angkon sa ikaduhang babaye nga gipadala siya sa United Kingdom ni Jeffrey Epstein alang sa usa ka sexual encounter kang Andrew Mountbatten-Windsor, base na sa apgtug-an sa iyang abogado kondiin nahitabo matid pa kini sa pinuy-anan sa kanhi prinsipe nga Royal Lodge niadtong 2010.
Ang babaye, nga dili Briton, anaa sa iyang early 20s niadtong panahona.
Matod sa abogado sa babaye nga si Brad Edwards sa US law firm nga Edwards Henderson, human daw siya magpalabay og gabii uban kang Andrew, gidala usab siya sa usa ka tour sa Buckingham Palace ug gipa-inom og tsa kondiin hangtud karon wala pa’y gipagawas nga komento si Andrew Mountbatten-Windsor bahin sa maong mga akusasyon.
Kasagaran gina-rekord sa Buckingham Palace ang pangalan sa mga bisita sa tour, apan wala pa makumpirma ang pagbisita sa babaye tungod kay kinahanglang masuta pa ang iyang identity.
Ang asoy sa babaye mahitungod sa pagpalabay niya og gabii sa pinuy-anan ni Andrew mao ang unang higayon nga adunay Epstein survivor nga mi-angkon nga adunay sexual encounter nga nahitabo sulod sa usa ka royal residence.
Si Edwards nagrepresentar og kapin sa 200 ka Epstein survivors sa tibuok kalibutan, ug siya usab ang abogado ni Virginia Giuffre, nga mi-angkon nga gidala siya sa London aron makighilawas sa kanhi prinsipe niadtong 2001 sa dihang siya 17 anyos pa.
Matod ni Giuffre, gipugos siya nga makighilawas kang Andrew og duha pa ka higayon tali sa 2001 ug 2002—usa ka higayon sa New York ug usa pa sa pribadong isla ni Epstein sa Caribbean.
Si Epstein nahukman niadtong 2008 tungod sa paghangyo og sex gikan sa usa ka 14-anyos nga babaye sa Florida ug natapos ang iyang sentensiya niadtong Hulyo 2010.
