BUTUAN CITY-Ming-mabot na sa 28 ang namatay sa Gaza lakip ang mga bata ug kababaihan tungod sa Israeli air strikes niadtong Sabado, sumala sa local civil defense agency kansa nagrepresenta sa Hamas.
Lakip sa mga biktima ang usa ka tigulang, upat ka babaeng pulis, ug daghang sibilyan samtang daghan pa ang gi-report nga nawawala ilawom sa minghagsa nga estruktura.
Sigon sa Israel, nga ang pag-atake mao ang retaliation sa giingong paglapas sa ceasefire sa Hamas, diin walo ka fighters ang migawas gikan sa tunnel sa habagatang Gaza.
Target usab sa Israel ang upat ka commanders ug mga giingong bag-ong terorista gikan sa Hamas ug Islamic Jihad. Gitawag sa Hamas ang insidente nga “brutal crime,” samtang gibutyag sa Gaza health ministry nga padayon ang kakulang sa medical supplies ug grabe ang humanitarian crisis.
Sukad sa pagsugod sa ceasefire niadtong Oktubre 10, kapin sa 509 katao na ang namatay sa Gaza ug upat ka Israeli soldiers ang napatay sa militant attacks. Sa pikas bahin, gi-anunsyo sa Israel nga ablihan na usab ang Rafah crossing padulong Egypt karong adlawa Domingo, apan limitado lang sa paglihok sa pipila ka tawo.
Ang pagbukas sa border gi-ila nga usa sa mga kondisyon sa ikaduhang phase sa Gaza ceasefire kansa dugay nang gihuwat sa mga humanitarian organizations, samtang nagpadayon ang tensyon ug kalisod sa rehiyon.
