BUTUAN CITY – Pasado na sa House Committee on Higher and Technical Education ang House Bill No. 2778, nga nailhan usab isip Student Internship Allowance Act kansang tumong mao ang paghatag og pinansyal nga tabang sa mga estudyante nga mihimo og internship, practicum, o on-the-job training isip kabahin sa ilang pag-eskwela.
Ilalom sa maong sugyot-balaudnon, ang mga estudyante nga malampusong makahuman sa ilang internship, practicum, o on-the-job training sa mga kolehiyo ug technical-vocational institutions sa tibuok nasud, makadawat og ₱10,000 nga one-time internship allowance.
Sakop niini ang ilang plete sa biyahe paingon ug pabalik sa lugar sa ilang training, lakip na usab ang ilang adlaw-adlaw nga pagkaon.
Sumala ni Representative Jude Acidre, gi-ila sa balaodnon ang importanteng papel sa internship isip tulay nga nagdugtong sa teoretikal nga pagtuon sulod sa classroom ug sa tinuod nga kalibutan sa trabaho.
Cover usab niini ang tanang estudyante nga nag-eskwela sa pampubliko ug pribadong mga eskwelahan sa tibuok Pilipinas, basta ang mga eskwelahan gi-ila sa Commission on Higher Education (CHED).
Ang allowance nga ihatag sa mga estudyante dili taxable, pasabot nga dili kini bugisan ug dili usab transferable, busa dili kini mahimong ipasa sa lain nga tawo.
Dugang pa, walay bisan unsang kaltas nga buhaton sa allowance, ug ang tibuok kantidad nga ₱10,000 mapadulong gayod sa estudyante.
