BUTUAN CITY – Gibatikos sa usa sa mga survivors sa mitiklaob nga roll-on roll-off kon Ro-Ro vessel sa kadagatan sa Baluk-Baluk Islands sa Basilan nga si Atty Aquino Sajili, ang kaya-ya sa pagresponde sa Philippine Coast Guard.
Sa eksklusibong pakighinabi sa Bombo Radyo Philippines, gipadayag niini nga dihang mitakilid na ang barko pasado ala-una na sa kaadlawon, nakatawag pa siya sa iyang ka-ubanang abogado nga board member usab sa Basilan ug gipapalihog nga luwason sila sa maong lugar apan naka-abot ang mga sakop sa Philippine Coast Guard paglabay na sa kapin tulo ka oras.
Kung nadali unta matud pa ang pagresponde gamit ang mga paspas nga sakyanang pandagat, hayan daghan matud pang kinabuhi ang naluwas.
Dismayado usab siya sa gipasi-atab sa PCG nga ang mga dagkong balud ang hinungdan sa ilang pagtiklaob tungod kay klaro matud pa sa nag-viral nga mga videos dihang anaa na sila sa dagat nga kalmado lang ang dagat kansa nagsugod lang pagbalud dihang nangabot na ang mga rescuers pasado alas-4:30 na sa kaadlawon.
Gipasabot pa niini nga kung dagko pa ang mga balud niadtong tungura, siguradong mas daghan ang casualties tungod kay wala matud pa’y maayong swimmer nga maka-survive sa kapin tulo ka oras nilang pagpalutaw-lutaw sa dagat.
