BUTUAN CITY – Mahimong suspendihon o ihunong ang sweldo ni Senator Ronald “Bato” Dela Rosa, kinsa wala na nakatambong sa Senado sukad pa niadtong Nobyembre 2025, kung adunay rekomendasyon ang Senate ethics committee.
Sumala ni Senate President Pro Tempore Panfilo “Ping” Lacson, mi-adto sa Senado si kanhi Senador Antonio Trillanes IV aron makigkita kaniya ug kang Senate President Vicente “Tito” Sotto III.
Usa sa ilang gihisgutan mao ang plano ni Trillanes nga magsumite og ethics complaint batok kang Dela Rosa, nga posibleng isumite sa Marso.
Dugang ni Lacson, usa sa mga suhestiyon mao nga i-suspende o ihunong ang sweldo ni Dela Rosa, apan kinahanglan pa kini tun-an og maayo tungod kay sakop sila sa Civil Service Law apan kung ma-adopt sa plenaryo ang rekomendasyon sa ethics committee, mahimo kining ipatuman ug mahimong basehan sa paghunong sa sweldo.
Sa pinakagrabe nga senaryo, gibutyag ni Lacson nga mahimo usab nga mapreso si Dela Rosa sa The Hague tungod sa posibleng arrest warrant sa International Criminal Court (ICC) nga may kalabotan sa gubat kontra droga sa administrasyong Duterte, diin siya kaniadto ang hepe sa Philippine National Police kon PNP.
