BUTUAN CITY – Gipahigayon sa Taguibo Water Quality Management Area – Multisectoral Group ang komprehensibo nga water quality sampling ug monitoring sa Taguibo River sa Barangay Anticala ning siyudad sa Butuan aron masuta ang kahimtang sa tubig ug masiguro ang kaluwasan niini alang sa katawhan.
Gikuhaan og 18 ka samples gikan sa mga designated stations sa maong suba, nga dad-on dayon sa laboratoryo aron susihon ang pH, presensya sa bacteria, nutrients, ug uban pang water quality parameters.
Ang resulta ipahibalo sulod sa tulo ka semana. Nanguna sa pagkuha sa mga sample ang Department of Environment and Natural Resources – Environmental Management Bureau (DENR-EMB) kauban ang City Environment and Natural Resources Department (CENRD) ug Butuan City Water District (BCWD).
Ang maong kalihokan ginabuhat matag bulan aron masiguro nga ang tubig sa Taguibo River luwas imnon sa katawhan ug makasuporta sa ekonomiya, agrikultura, ug aquatic life sa syudad. Kini usab kabahin sa pag-obserba sa Watershed Consciousness Week.
