BUTUAN CITY – Gipamatud-an sa mga opisyal ug mga stakeholders sa turismo nga andam na ang Cebu sa pag-host sa Association of Southeast Asian Nations kon ASEAN Tourism Forum 2026 human sa hapsay ug makuting pagpangandam ug mga pagpaayo sa imprastruktura.
Sigon sa Department of Tourism, ang dakong oportunidad sa Cebu sa pagpalig-on pag-usab sa lokal nga ekonomiya pinaagi sa maong kalihokan, gilauman nga maghatag og dakong multiplier effect.
Gipadayag ni Tourism Secretary Christina Garcia-Frasco , ang maong event usa ka kahigayunan aron ipakita ang ka-andam sa Pilipinas ug sa Cebu isip usa ka world-class destination, ilabina human sa mga hagit nga mugna sa linog, bagyo, ug baha niadtong 2025.
Sumala pa ni Sec. Frasco, gilauman nga magdala og dagkong benepisyo sa lokal nga industriya sa turismo ang Travel Exchange (Travex), nga magdugtong sa mga international buyers ug sa mga lokal nga destinasyon sa nasod.
Himoon ang Travex travel-trade event gikan Enero 28 hangtod 30 sa Mactan Expo sa Lapu-Lapu City, nga gilauman nga tambongan sa kapin sa 5,000 ka opisyal nga delegado gikan sa ASEAN, gawas pa sa ubang mga bisita nga may kalabutan sa summit.
Dugang pa sa kalihim, kapin sa 10,000 ka tourism frontliners gikan sa nagkalainlaing rehiyon ang miagi sa mga pagbansay aron masiguro ang taas nga lebel sa serbisyo alang sa mga bisita.
