BUTUAN CITY – Nihubas na ang tubig sa Brgy Tagmamarkay, lungsod sa Tubay, Agusan del Norte, apan nagpabilin gihapon ang mga bakwit sa mga evacuation centers.
Sumala ni Jimmy Ceballos, hepe sa Municipal Disaster Risk Reduction and Management Office kon MDRRMO, adunay 611 ka mga pamilya nga apektado gikan sa unom ka barangay nga gilangkuban sa Tagmamarcay, Doña Telesfora, Santa Ana, Poblacion 1 ug 2, ug Doña Rosario.
Gibutyag niini nga ang lugar sama sa Tagmamarcay ,pirme makasinati og pagbaha, busa naghimo na sila og pre-emptive evacuation adiser pa niabot ang tubig. Karong adlawa tugotan na sila nga makapauli sa ilang tagsa-tagsa ka panimalay karong nakagawas na ang bagyong Ada sa Caraga Region.
Gipasalig usab ni Ceballos nga padayon ang ilang pagpanghatag og food packs gikan sa Municipal Social Welfare Development Office.
Wala’y natala nga landslide sa ilang lungsod apan adunay report nga na-damage ang usa ka footbridge ug padayon pa gihapon ang ilang assessment nga ginahimo aron masuta kung unsa kadako ang kadaot.
