BUTUAN CITY – Gipabakwit na sa mga barangay officials sa Brgy Los Angeles ning siyudad sa Butuan ang 97 ka pamilya kon bugti sa 307 ka indibidwal ngadto sa Los Angeles Elementary School, samtang 27 ka mga pamilya usab o 86 ka mga indibidwal ngadto sa Los Angeles National High School.
Kini human misaka ang tubig baha sa ubang parte sa barangay kondiin mi-alalay gilayon ang response team sa City Disaster Risk Reduction and Management Department (CDRRMD) aron masiguro ang luwas nga pagbakwit sa mga na-apektuhan.
Sigon ni Kapitan Irene Monden, sa Purok 9, nagtinabangay ang mga residente paghimo og kanal aron ma-divert ang tubig padulong sa pikas tampi sa kaumahan ug malikayan ang dugang pagsaka sa tubig-baha. Ang mga pamilya nga gidala sa mga evacuation centers, gitagaan na og pagkaon, higdaanan, ug uban pang panginahanglanon samtang padayon ang monitoring sa kahimtang sa lugar.
Sumala ni Kapitan Kap Irene Monden, kagahapon pa lang sa kaadlawon, gibakwit na ang maong mga indibidwal human mi-apaw ang tubig-baha gikan sa Tagnote, sa Brgy Santo Niño.
