BUTUAN CITY – Gidayeg ni Pangulong Ferdinand Marcos Jr. ang mga Pilipino sa United Arab Emirates (UAE) tungod sa ilang dakong tabang sa UAE ug sa Pilipinas.
Sa iyang pagpamulong atol sa pakigkita niya sa 700 mga OFWs, gipadayag sa pangulo nga garbo ug dungog sila sa nasud tungod sa ilang dakong papel sa pagtukod ug paglambo sa UAE sukad pa niadtong 1971.
Pinaagi matud pa sa ilang maayong trabaho, disiplina, ug panaghi-usa, nahatagan og maayong pangalan ang mga Pilipino dili lang sa UAE kundi apil na sa mga nasud nga adunay daghang Pilipino sa Middle East.
Gidayeg usab sa Presidente ang kugihan ug kalig-on sa mga OFW sa tibuok kalibutan, hinungdan nga respetado sila sa ilang mga amo ug komunidad.
Gipasiguro niya nga padayon nga panalipdan sa gobyerno ang kahimtang sa mga OFWs ug maghimo og mga programa alang sa ilang kaayohan aron nga ang matag-Pilipino, anaa man sa Pilipinas o sa gawas, adunay higayon nga molampos, pinaagi sa mas daghang trabaho ug mas lig-on nga relasyon sa UAE sa pamatigayon ug pamuhunan.
Gidasig usab niya ang mga Pilipino nga magpadayon sa pagkat-on ug pagpauswag sa ilang kahanas, ug ipadayon ang bayanihan o pagtinabangay.
Sa iyang duha ka adlaw nga bisita sa UAE, nasaksihan ni President Marcos ang pagpirma sa Comprehensive Economic Partnership Agreement (CEPA) ug sa kasabutan sa kooperasyon sa depensa tali sa Pilipinas ug UAE.
