BUTUAN CITY – Naka-abot na sa Abu Dhabi sa United Arab Emirates si Pangulong Ferdinand ‘Bongbong’ Marcos Jr, alang sa usa ka adlaw nga working visit base na sa imbitasyon usab ni UAE President Sheikh Mohammed bin Zayed Al Nahyan.
Pasado alas-onse kagabii, oras sa Pilipinas, mitugpa ang eroplanong gisakyan sa pangulo kondiin gisugat siya ni UAE Minister of State Saeed Bin Mubarak Al Hajeri.
Mu-apil ang pangulo sa Abu Dhabi Sustainability Week 2026 nga sugdan karong adlawa. Lakip sa nag-unang tumong sa pagbisita sa pangulo mao ang pagpirma sa duha ka kasabutan ug apil niini ang pagpirma niya sa Comprehensive Economic Partnership Agreement (CEPA).
Kini mao ang unang trade deal sa Pilipinas sa usa ka nasud sa Middle East ug unang koneksyon niini sa usa ka miyembro sa Gulf Cooperation Council (GCC), nga magbukas sa mga pamuhunan gikan sa UAE nga maghimo og mas daghang oportunidad alang sa mga Pilipino, sulod sa Pilipinas ug sa UAE.
Makigtagbo usab ang pangulo sa mga negosyante sa maong nasud ug makigkita sa mga Filipino nga atua nagtrabaho ug nagpuyo sa maong nasud nga maghatag og kaayo sa Pilipinas ug sa kapin 900-mil ka mga Pinoy nga atua sa maong nasud.
