BUTUAN CITY – Nagsubmite ang kampo ni kanhi Pangulong Rodrigo Duterte og joint report nga gihimo sa ilang mga medical experts.
Sumala sa abogado sa kanhi pangulo nga si Nicholas Kaufman, ang maong lakang, suporta sa ilang pamahayag mahitungod sa tinuod nga kahimtang sa panglawas sa 80-anyos nga kanhi pangulo, ug rason kung nganong kinahanglan na siyang buhian gikan sa pagkapriso sa International Criminal Court (ICC) facility.
Sa 12 ka palid nga report nga ilang gisubmite sa ICC Pre-Trial Chamber I, gikabutyag nga ang bag-ong medical evidence gitumong aron mutabang sa Pre-Trial Chamber pag-assess sa kahimtang sa panglawas sa kanhi pangulo alang sa iyang pag-atubang sa mga pagdungog.
Gisulat usab sa joint report nga ang kanhi pangulo adunay kakulang sa executive functioning, nakasinati og limitadong kapasidad sa pagplano, hinay sa pagdesisyon, kulang sa kusog pisikal, ug walay abilidad nga malikayan ang pagbantay.
Tungod niini, wala siyay kapasidad nga mohimo og hulga batok sa mga testigo ug dili usab siya makadaut sa integridad sa imbestigasyon.
Tungod sa maong mga kahimtang, mihangyo si Kaufman nga hisgutan ug ikonsidera na sa Pre-Trial Chamber ang pag-apruba sa interim release ni Duterte.
