BUTUAN CITY – Gisa-ulog sa Bombo Radyo Philippines ang ika-60 ka tuig sa media excellence pinaagi sa Top Level Management Conference nga gipahigayon sa Iloilo City sugod karung adlawa Enero 5 hangtod 11, nga adunay temang “Bombo Radyo Philippines: Celebrating 60 Years of Media Excellence.”
Gipangulohan nila Chairman Dr. Rogelio M. Florete ug President/CEO Margaret Ruth C. Florete ang maong kalihokan nga gitambungan sa mga station managers ug senior officers gikan sa 25 ka mga key areas sa network.
Ang usa ka semana nga panagtigum nagpunting sa strategic planning ug direction-setting isip preparasyon sa network alang sa umalabot nga mga tuig ug naghisgot sa mga isyu sa inobasyon, pampublikong serbisyo, ug padayon nga pagtahod sa kredibilidad ug responsableng broadcasting.
Isip kabahin sa ika-60 nga anibersaryo, gipakita sa Bombo Radyo Philippines ang daghang prestihiyosong award sa natad sa news reporting, public affairs programming, ug public service broadcasting.
Lakip niini ang Bombo Network News nga nakadaog og back-to-back Best News Program sa Catholic Mass Media Awards (2024–2025), ug ang Star FM nga giila isip Best Entertainment Program sulod sa tulo ka sunod-sunod nga tuig (2023–2025) samtang ang flagship station nga Bombo Radyo Iloilo, nakadawat usab og Golden Dove Awards isip Best AM Station (Provincial) ug Best News Program (Provincial).
Gipalig-on sa mga independent surveys ang kredibilidad ug pagsalig sa publiko ngadto sa Bombo Radyo, human gi-ila isip Most Trusted News and Information Source sa radio category sa National Survey on Media and Information Literacy sa Philippine Information Agency niadtong Nobyembre 2024.
Gi-ila usab kini sa OCTA Research niadtong Disyembre 2024 nga nag-unang radio source sa balita ug impormasyon sa mga Pilipinong hamtong ug padayon nga nanguna sa quarterly Pahayag Survey sa Publicus Asia, Inc. isip Most Trusted Media Outlet sa radio.
Kini nga mga kadaogan ug survey nagpamatuod sa dedikasyon sa Bombo Radyo Philippines sa pagpanalipod sa labing taas nga sukdanan sa broadcast journalism.
Ang kumperensiya nagpalig-on sa bansag sa Bombo Radyo isip nag-unang radio network sa nasud nga adunay 32 ka digitalized AM ug FM stations sa tibuok Pilipinas, ug nagsilbing kinasing-kasing nga pasalamat sa publiko.
Tungod sa inyong suporta, ang Bombo Radyo magpadayon sa pagpalambo sa maayong pagpadayag ug sa paghatod sa mga balita ug serbisyong publiko nga dili matupngan.
