BUTUAN CITY – Tinuod nga malipayong Pasko ang nasinatian karon sa kampo ni kanhi Butuan City Mayor Ferdinand Amante Jr human gi-reverse sa Korte Suprema ang desisyon sa Sandiganbayan sa kasong graft nga gipasaka sa Ombudsman kalabot sa iregular matud pa nga pagpalit ug pag-install sa Positron Emission Tomography/Computed Tomography kon PET/CT scan machine sa may Butuan Medical Center kon BMC.
Sigon sa legal counsel sa kanhi mayor nga si Atty Froilan Montero, ang desisyon sa first division sa Korte Suprema sa ilang apela, nagpawala’y bili sa naha-una nang desisyon ug resolusyon sa Sandiganbayan nga nagpahamtang sa kanhi mayor og unom ngadto sa napulo ka tuig nga pagkabilanggo.
Dakong regalo kini alang sa kanhi mayor uban sa iyang pamilya ug sa mga Butuanons nga nagmahal kaniya ug nag-ampo sa maong desisyon.
Saysay pa ni Atty. Montero, ayol sa pagtaral sa Sandiganbayan sa maong kaso, ila ang gitan-aw ang mga ebidensya ug nalipay sila nga nakita sa Korte Suprema ang punto de vista sa depensa resulta sa acquittal sa maong kaso.
Dinhi usab nakita nga wala’y kamatu-uran ang desisyon sa Sandiganbayan nga nagpasagad ang kanhi mayor sa paggasto og 15-milyunes pisos aron lang madala ug maplastar sa Butuan Medical Center ang nasangpit nga makina nga wala pa mu-function dayon tungod kaykinahanglan pa og technical ingon man software support.
