BUTUAN CITY – Upat ka balay ang na-abo na samtang laing unom ang partially burnt sa pila ka oras nga sunog ning mismong adlaw sa Pasko kansa natigayon kaganinang alas-onse sa buntag sa Purok 5, Brgy Baan Riverside ning siyudad sa Butuan.
Sa maong ihap, 12 ka mga pamilya ang apektado nga gilangkuban sa 49 ka mga indibidwal nga kadaghanan, wala’y nabitbit nga mga gamit tungod sa kapaspas sa paglatay sa kalayo.
Sigon sa usa sa mga nasunugan nga si April John Sanchez, pulos balay sa iyang mga kabanay ang gilamoy sa kalayo nga sa sinugdanan dihang duna’y nag-aso, wala nila panumbalinga tungod sa ilang paglipay-lipay sa pagsa-ulog sa Pasko.
Dihang nakita na nila ang kalayo, ulahi na silang nakasablig og tubig tungod sa paspas nga pagdako niini.
Ang ila matud pang gi-una mao ang pagpagawas sa ilang mga kabanay ug pipila lang ka mga gamit.
Samtang gipadayag ni Kapitan Yul Liza Corvera nga ila pang gisuta ang report nga gikan matud pa ang mi-ulbo nga kalayo sa ayuhanan og videokehan human nga duna’y mibuto ug base sa iyang nadumduman, wala kini makakuha og permit sa ilang barangay.
Ila pa usab nga hisgutan sa barangay council ang tabang nga matunol ngadto sa apektadong magkabanay.
