BUTUAN CITY – Gibutyag ni Batangas 1st District Rep. Leandro Legarda Leviste nga nagtugon na siya sa iyang mga kasaligan nga ipagawas sa publiko ang tanan niyang mga files kung aduna’y dautang mahitabo kaniya.
Gipadayag kini ni Leviste kagahapon sa bisperas sa Pasko, pipila ka oras human niya gipadayag sa publiko ang 19 ka palid nga listahan sa mga proponents sa mga proyekto sa Department of Public Works and Highways (DPWH) ilalom sa P6.326-trilyon nga national budget sa 2025 kondiin nabulgar ang milyunes pisos nila nga mga allocables.
Bisan pa nga wala siyay gipunting nga mga insertions sa mga magbabalaod, gipakita sa listahan ang milyones pisos nga kantidad nga mahimong igahin sa matag-kongresista kada-tuig.
Dugang pa ni Leviste, bisan Pasko na, gihisgutan gihapon nila sa iyang inahan nga si Senadora Loren Legarda ang iyang trabaho. Gipahinumdoman matud pa niya ang iyang inahan sa iyang direktiba kung adunay mahitabo kaniya, kinahanglan ipagawas ang tanang gibiling dokumento ug ipadayon ang pagbutyag sa impormasyon.
Wala hinganli sa 32-anyos nga magbabalaod ang mga tawo nga iyang gisugo dayong hisgot sa bag-ong pagpanaw sa kanhi DPWH Undersecretary Maria Catalina Cabral, nga maoy tinubdan sa maong listahan kansang pagkahulog sa pangpang sa Benguet, padayon pang gi-imbestigasyon sa mga awtoridad.
