BUTUAN CITY – Ang nakuha nga General Information Sheets kon GIS gikan sa Securities and Exchange Commission kon SEC maoy gisaligan nga lig-ong ebidensya nila Atty Mary Helen Polinar Zafra aron kasuhan og graft ug plunder si Surigao del Sur 1st District Rep Romeo Momo Sr ngadto sa Office of the Ombudsman.
Sa eksklusibong pakighinabi sa Bombo Radyo Butuan, gipadayag ni Atty Zafra nga bakak ang gipasi-atab ni Congressman Momo nga politically motivated ang ilang gipasakang kaso tungod kay tuig 2019 pa sila nangayo og certified true copy sa GIS sa SEC – ang tinuig nga pagsumite og disclosure document aron ma-update ang SEC sa kasamtangang corporate structure, ownership ug mga key officers sa usa ka kompanya.
Dinhi nila naklaro nga niadtong 2019 dihang midaug si Momo isip Construction Workers Solidarity kon CWS partylist representative, usa gihapon kini sa mga Board of Directors sa ilang family company nga Surigao La Suerte Corporation kon SLSC.
Nasuta usab nila base sa GIS, nga wala’y nasubmiteng record ang maong kompanya sa tuig 2020 ug 2021 samtang sa tuig 2023 kondiiin kongresista na siya sa ilang lalawigan, nakumpirmang usa gihapon kini sa mga board of directors sa maong kompanya.
Samtang ang usa ka kaso, duna’y kalambigitan sa mga fuel contracts nga gi-award sa Department of Public Works and Highways kon DPWH ngadto sa SLSC nga maoy fuel supply business sa pamilyang Momo.
Gipasabot usab ni Atty Zafra nga plunder ang ilang gipasakang kaso ubos sa Republic Act 7080 tungod sa kapin uno-bilyunes pisos nga kwartang nakuha sa kompanya gikan sa mga infrastructure projects gikan sa flood control, farm-to-market roads ug uban pa alang sa una ug ikaduhang distrito sa lalawigan samtang graft usab ang laing usa ka kaso tungod kay wala man naka-abot sa 50-milyunes pisos nga threshold ang nakuha sa maong kompanya sa fuel contracts.
