BUTUAN CITY – Gimando na sa Philippine National Police kon PNP ang hugot nga imbestigasyon sa pagluba-patay sa broadcaster ug municipal councilor sa Marihatag, Surigao del Sur nga si Gerry Campos.
Sumala ni acting Chief PNP Police Lieutenant General Jose Melencio Nartatez, Jr., bisan og nasikop na ang 42-anyos nga suspek, kinahanglan gihapong masuta ang motibo sa krimen aron mahibaloan kung aduna pay laing tawo nga makonsiderang duna’y kalambigitan sa kremin. Hugotanon usab nga gikondena sa PNP ang krimen ug gipaniguro nga manubag ang mga nalambigit niini.
Kahinumduman nga giluba si Campos niadtong Sabado, Disyembre 6, samtang nagbaktas duol sa gasoline station sa Barangay Sta. Cruz. Nasikop usab ang suspek sa gipahigayong pursuit operation niadtong Domingo.
Gisiguro usab sa PNP chief ang saad niini nga protektahan ang mga residente ug miyembro sa media, dayong butyag nga ilang santaon ang kapintas batok sa mga tigbalita.
