BUTUAN CITY – Gikwestyon ni Senate minority leader Alan Peter Cayetano sa pagsugod sa period of amendment alang sa proposed 2026 national budget nga mu-abot sa ₱6.7-trillion, ang kawala’y committee amendments reports kalabot sa maong balaudnon.
Gipamugos ni Cayetano, kung dili magpagawas og kaugalingong amendment ang komite, sama ra nga nawad-a’g bili ang kinatibuk-ang proseso sa interpellation tungod kay wala’y nakitang kabag-uhan sa committee report nga ilang gipaningkamutan.
Samtang gipasabot usab ni Senate Finance Committee chairman Sherwin Gatchalian nga ang ilang committee report mao na ang magsilbi nilang committee amendments gawas nga duna na usa’y technical working group nga nagsusi sa sugyot nga bag-uhon ang budget sa pipila ka mga senador ug ubang buhatan sa gobyerno kansa gipasa na sa committee report sa budget bill.
Apan gipamugos ni Cayetano nga dapat duna usa’y kabag-uhan sa committee report kansa gihaguan nila pag-deliberate ning nakalabay’ng mga adlaw.
Dugang pa sa minority leader nga kung seryuso ang Senado sa paningkamot niining himuong transparent ang budget process, kinahanglan usab niining ibulgar kung kinsa ang nagsulod og nagkada-iyang amendments sa House General Appropriations Bill nga nasulod sa gisubmiteng committee report.
Samtang gisuportahan usab ni Senador Chiz Escudero ang pamahayag ni Cayetano sa ngalan sa transparensiya.
Tungod niini, iyang gisugyot nga i-upload sa Budget Transparency Portal ang mga gisugyot nga mga amyenda sa budget nga nasulod sa committee report ilabina nga mi-abot ang budget amendment ngadto sa 326-bilyunes pisos kansa gidawat usab ni Gatchalian.
