BUTUAN CITY – Magpatuman og pre-emptive evacuation sugod karong buntag ang lokal nga kagamhanan sa Tubay, Agusan del Norte alang sa ilang mga residenteng anaa sa mga delikadong lugar tngod sa hulgang hatud sa bagyong Tino.
Sigon ni Jimmy Ceballos, Chief sa Municipal Disaster Risk Reduction and Management Office kon MDRRMO-Tubay, gihimo nilang basehan ang super typhoon Odette rason sa sayong pagpagawas og executive order sa mayor alan sa suspensyon sa klase ug trabaho sa ingon dili na sila ma-alanganin alang sa ilang himuong mga operasyon.
Kagahapon sa hapon, mihimo sila og pre-assessment meeting kondiin ilang gihisgutan ang mga preparasyon sa ingon dili sila ma-caught off guard higayong mu-abot na ang bagyo.
Sumala pa niini, ila usab nga gi-tap ang mining company sa ilang lungsod aron maka-augment og Saddam truck alang sa dugang suporta sa pre-emptive evacuation nga himuon.
Dugang pa ni Ceballos, mas agresibo ug konserbatibo ang preparasyon sa Local Government Unit kon LGU Tubay karon kumpara sa panahon sa bagyong Odette, kansa nahimong dakong leksyon sa ilang disaster response.
Mas gipaningkamotan karon nga mapalig-on ang ka-andam aron malikayan ang dakong kadaot ug masiguro ang kaluwasan sa mga residente.
Nagpasalamat usab kini sa suporta sa mga partner agencies nga nag-commit sa pag-augment sa ilang resources alang sa kaluwasan sa komunidad.
Mopahigayon usab sila og situational update briefing uban kang Mayor Jimmt Beray aron mas maplano ug mahan-ay ang mga lakang nga angay buhaton alang sa umaabot pa nilang disaster preparedness.
