BUTUAN CITY – Determinado si Malaysian Prime Minister Anwar Ibrahim pagresoba sa krisis sa Myanmar.
Isip Association of Southeast Asian Nations kon ASEAN Chair karong tuiga, gibutyag ni Anwar ang panginahanglan sa mas lig-on ug kongkretong mga lakang aron mabalik ang kalinaw ug kalig-on sa nasud.
Gihangyo niya ang Myanmar nga magpatuman og inklusibong pamalaod aron mapadali ang panaghi-usa sa nasud. Iya usab nga giklaro ang papel sa hilom nga diplomasiya ug regional unity isip epektibong pamaagi sa pagsulbad sa krisis. Giklaro ni Anwar nga ang panahon karon, angay na alang sa seryosong dayalogo tali sa military junta ug mga oposisyon.
Gisuportahan usab niya ang Informal Advisory Group sa ASEAN nga nagtrabaho aron mapadali ang mga negosasyon ug kalinaw.
Ang liderato ni Anwar Ibrahim sa ASEAN naghatag og bag-ong paglaum sa rehiyon, ilabina sa Myanmar. Ang iyang panawagan alang sa kongkretong aksyon ug dayalogo nagpakita sa seryosong intensyon sa ASEAN nga motabang sa pag-ayo sa krisis.
