BUTUAN CITY – Gisugdan na karong adlawa sa Agusan del Norte Provincial Jail ang ilang pagsa-ulog sa National Correctional Consciousness Week hangtud sa Oktubre 27 sa pagpanguna ni provincial jail warden Fermin Antenorio.
Sigon sa opisyal, gibuksan kini pinaagi sa himuong kumpisal ug counseling nga gisundan sa balaang misa dayon sa opening program ug unyang hapon, himuon ang praise jam.
Samtang ugmang adlawa Martes, sa ikaduhang adlaw sa kasa-ulugan, duna’y himuong consultation dialogue aron matudluan ang mga living spacers kalabot sa criminal justice system sa nasud ug uban pang hisgutanan nga makutay sa ila karong sitwasyon ilabina ang ilang mga katungod.
Sundan kini pagkahapon sa Feeling Pogi 2025, usa ka male pageant nga apilan sa mga living spacers.
Magpadayon ang uban pa nilang nakahan-ay nga mga kalihukan hangtud sa katapusang adlaw kondiin didto na himuon ang awarding ceremony sa tanang mangdaug sa ilang mga himuong kompetisyon.
Alayon niini karon pa lang, nagpasalamat na si Antenorio sa tanang mga misuporta sa maong selebrasyon aron kini magmalampuson ug maghatag og kadasig sa mga living spacers nga magpakabuhing matarong samtang anaa pa sulod sa maong pasilidad.
