BUTUAN CITY – Ilusad unyang gabii sa Trillion Peso March Movement didto sa EDSA Shrine ang White Friday Protest nga parte sa ilang build-up activities padulong ngadto sa November 30 nga rali kansa ma-atol sa adlaw’ng natawhan ni Gat Andres Bonifacio.
Sa eksklusibong pakighinabi sa Bombo Radyo Philippines, gipadayag ni Fr Tony Labiao, sa Diocese of Novaliches sa Quezon City, unang himuon ang misa nga sundan sa pag-ampo sa ‘Oratio Imperata’ kansa gigama sa Diocese sa Manila pahinungod ngadto sa tanang Pilipino aron magpabiling lig-on taliwa sa mga hagit nga gi-atubang karon sa kinabag-an, tungod sa lapad nga kurapsyong natigayon sulod mismo sa gobyerno.
Sundan kini sa candle-lighting ug noise barrage ug pagka-alas otso sa gabii, ipatingog na dayon ang mga kampana ug noise barrage aron ipa-abot sa gobyerno ang kadismaya sa ma Pilipinas sa garapalang kurapsyon nga natigayon sa nasud gikan sa nagkada-iyang proyekto nga alang unta sa kinabag-ang katawhan.
Giklaro ni Fr Labiao nga synchronised kini nga kalihukan tungod kay muhimo usab niini ang mga tawo sa gawas nga bahin sa St Apostle Parish sa Quezon City ingon man Good Shepherd Parish sa Brgy Novaliches sa Quezon City uban usab sa ubang mga lugar sa nasud.
Himuon matud pa kini nga kalihukan matag-Biernes kansa gitawag nilang KKK kon Kalampag Kontra Kurapyon hangtud nga mu-abot ang Nobyembre 30.
Samtang kada-Dominggo, himuon usab ang National Day of Prayer and Repentance nga pangunahan usab sa Catholic Bishops Conference of the Philippines kon CBCP aron masiguro ang wala’y hunong nga agbantay sa atong nasud gikan sa mga hiwing opisyal.
Gipasabot pa ni Fr Labiao nga ang gilusad nilang Trillion Peso March niadtong Septembre 21, gihimo na nilang movement aron ipadayon ang pagprotesta sa katawhan kontra kurapsyon.
Kwalisyon matud pa kini sa nagkada-iyang civil society organizations nga kadaghanan, salmutan sa mga simbahan o parokya, mga tunghaan, apil na sa mga probinsya nga salmutan sa mga kabatan-unan.
Magpadayon kini hangtud nga malimpyo na ang gobyerno sa nasud.
Panawagan matud pa sa Trillion Peso March movement ang paspas nga imbestigasyon dungan sa pagbulgar sa tanang mga nalambigit niini ug dili kay pugung-pugungan pa sa mga tawong posibleng nakabenepisyo usab sa kurapsyon.
Kini aron mapriso na ang mga angayang mapriso, mabalik ang bilyunes pisos nga kwartang gikawat gikan sa kaban sa katawhan ug i-practice ang transparensiya.
