BUTUAN CITY – Gipaniguro ni Veronica “Kitty” Duterte nga buhi ug maayo ang kahimtang sa iyang amahan nga si kanhi Pangulong Rodrigo Duterte human sa iyang pagbisita sa International Criminal Court (ICC) detention facility sa The Hague, Netherlands kagahapon.
Bisan pa man, nagdumili si Kitty paghatag og detalye kay gipasabot sila nga dili pa angay magpagawas og impormasyon mahitungod sa ilang pagbisita.
Gibutyag niini nga tungod kay 80-anyos na ang kanhi Pangulo, natural lang nga adunay mga gihambin nga sakit, apan lig-on ug kusgan pa gihapon kini bisan sa iyang edad.
Nagpasalamat na lang si Kitty sa mga supporters sa iyang amahan nga nagplano untang magtapok sa adlaw sa confirmation of charges sa The Hague aron ipakita ang ilang suporta apan wala madayon tungod kay gisibog usab kini.
