BUTUAN CITY – Apil sa gibulabog ni Navotas Rep. Tobias ‘Toby’ Tiangco nga milambigit sa budget insertions gawas sa mga sakop sa Bicameral Conference Committee mao ang Small Committee nga muhimo sa ilang palusot human sa second reading.
Gilangkuban matud pa ang small committee nila Congressman Elizalde ‘Zaldy’ Co isip chairman; ang senior vice chairman sa House Committee on Appropriations mao si Congresswoman Stella Luz-Quimbo uban nila House Majority leader Congressman Manuel Jose ‘Mannix’ Dalipe ug House Minority leader Marcelino ‘Nonoy’ Libanan.
Ang problema sa Small Committee tungod kay wala sila’y record sa mga padulngan sa budget insertions taliwa nga kinahanglang anaa kini human nila mapapasar ang usa ka balaudnon o kaha pito ngadto sa 15 ka mga adlaw human sa ilang katapusang sesyon.
Mismong si Senate Blue Ribbon Committee chairman Rodante Marcoleta ang daw mibulgar atol sa pagdungog nga taliwa sa duha ngadto sa tulo ka buwan nilang himuong budget deliberations dihang membro pa siya sa Kamara kondiin halos manggi-away na sila, mahulog ra gihapon kini sa wala tungod kay ang Small Committee man ang duna’y final say niini.
