76 patay sa midilaab nga bus sa Afghanistan

BUTUAN CITY – Patay ang 76 ka tawo sa nasunog nga bus sa Herat City, Afghanistan human  nabangga sa usa ka truck nga dunay kargang gasolina ug usa ka motorsiklo.

Nasayrang gikan ang bus sa Islam Qala, usa ka lungsod nga duol sa utlanan sa Iran ug Afghanistan, ug paingon unta sa Kabul. Tungod sa pag-ulbo sa kalayo nga misunod sa panagbangga, daghang lawas ang dili na mailhan.

Base sa taho, 17 ka bata ang apil sa mga namatay. Ang mga pasahero mao ang mga Afghan migrants nga gipapauli gikan sa Iran, subay sa mas hugot nga kampanya batok sa mga walay dokumento nga langyaw.

Kapin sa 1.5 milyones ka Afghans ang napugos nga mopauli sa ilang nasod karong tuiga.