BUTUAN CITY – Tapuson na sa Department of Trade and Industry kon DTI-Agusan del Norte karong Dominggo, Hulyo 20 ang pagsa-ulog nila sa Micro, Small and Medium Enterprises kon MSME 2025 Week.
Ang kasa-ulugan karong tuiga, nagsabak sa temang ‘Asenso Negosyo, Angat Kabuhayan: Bagong Pilipinas!.
Sigon ni Arcily Gonzaga, ang Chief Trade and Industry Development Specialist sa DTI-Agusan del Norte, gibuksan nila ang maong kasa-ulugan niadtong Lunes, Hulyo 14 nga gipahigayon sa usa ka hotel ning siyudad sa Butuan.
Ubay-ubay nga mga kalihukan ang ilang gihimo uban ang mga MSM entrepreneurs ning lalawigan sama sa pagpa-ilalom kanila sa mga learning sessions sama sa financing forum aron mas mahatagan sila og ideya sa pagpalambo sa ilang negosyo.
Gi-orient usab sila kalabot sa digital transformation ingon man business forum kondiin gipanghatagan sila og mga certificate tungod sa ilang pag-apil. Tapuson kini sa paghatag og award alang sa mga outstanding taxpayers ning lalawigan.
