BUTUAN CITY – Igo na lang sa pagdanguyngoy ang bana sa usa babayeng buntis human kini nakabsan sa kinabuhi dihang nadat-ugan sa nalukat nga punuan sa lubi kaganinang hapon lang sa may Sitio Talaod, Brgy. Ticulon, lungsod sa Malita, Davao Occidental.
Migawas sa inisyal nga imbestigasyon nga nanglaba sa atabay ang 23-anyos nga biktimang si alyas Inday kinsa siyam ka buwan nang buntis dihang kalit lang nalukat ang punuan sa lubi tungod sa kusog nga hangin.
Nasayrang nakadagan pa ang biktima apan mibalik matud pa sa agi aron luwason ang 3-anyos niyang anak hinungdan nga na-abtan kini sa punuan nga midat-og sa iyang entiro likod kondiin namatay usab sa maong insidente ang ilang bịnuhing iro.
Nasuta nga naka-angkon og bali sa paa ug mga samad sa ulo ang biktima hinungdan sa iyang kamatayon.
