BUTUAN CITY – Gisugdan na ang operasyon sa state-of-the-art nga soil testing laboratory nga gitukod sa Prosperidad, Agusan del Sur kansa mao ang pinaka-una sa pulo sa Mindanao kansa maoy gila-umang makapa-usab padulong sa abundang ani ug kita sa mga mag-uuma sa probinsiya human kini gisubhan niadtong Hunyo 24.
Sigon ni Governor Santiago Cane Jr., mag-uma ang nag-unang panginabuhian sa mga tawo sa ilang lalawigan rason nga giprayuridad niya ang paggahin og ₱400,000,000.00 nga pundo aron lang matuman ang katukuran sa maong soil laboratory.
Duna kini modernong teknolohiya nga duna’y kakapas nga mususi og tag-usa ka gatus ka mga samples kada-adlaw kondiin ang resulta, mugawas paglabay sa usa ka semana.
Sigon ni Gov Cane, importante ang soil testing aron masayran sa mga mag-uuma ang tukmang lagutmon nga itanom sa yuta diha sa ilang lugar ug malikayan ang sayop nga paggamit sa mga agricultural inputs nga maoy hinungdan sa pagka-alkansi tungod sa hinay niini nga produksyon.
Gipasigarbo usab ni Gov Cane nga aduna kini kakapas nga mususi sa tubig, apil na sa mga plant ug gas samples.
Nasayrang ang lokal nga kagamhanan na ang magbayad sa soil analysis aron libre ang serbisyo sa mga mag-uumang Agsurnon tungod kay suportado man sa Australian Centre for International Agricultural Research ang maong proyekto.
