BUTUAN CITY – Mibati na og kahadlok ang mga Pinoy sa Israel tungod sa nagkagrabeng pag-atake sa Iran nga dunganon pa ang pagtira ang tag-usa ka gatus ka mga drones ug ballistic missiles padulong sa bisan asang direksyon.
Sigon ni Bombo international news correspondent Shay Kabayan, wala’y pili sa pag-atake ang Iran tungod kay bisan ang mga civilian sites gi-apil naman nila og tira.
Dugang ni Kabayan, kung kaya sa Israel ang mga missiles nga itira sa mga rebeldeng Hamas gikan sa Gaza Strip padulong sa Israel, lahi matud pa ang sa Iran.
Kini tungod kay sa kadaghan sa ilang ipangtira sulod lang sa usa ka hugna, dili na masalo sa ilang Iron Dome ang uban rason nga duna’y makatugpa sa mga residential areas nga naghatag karon og kakuyaw sa mga sibilyan.
Kini ilabina nga ubay-ubay na ang casualties sa ilang nasud mugna sa sunod-sunod nga tira sa Iran.
Bisan matud pa og duna’y bomb shelter ang bag-ong mga apartment unit sa Israel, apan dili matud pa kini siento-porsientong masaligan nga muluwas sa ilang kinabuhi tungod kay lahi kini sa karaan nga gipangtukod nga anaa sa underground.
