BUTUAN CITY – Delikado kaayo ang sitwasyon karon sa Israel tungod sa padayong pag-atake sa Iran gamit ang ballistic missiles rason nga gitambagan sila sa Israeli Defense Forces nga mag-amping sa kanunay.
Sa eksklusibong pakighinabi sa Bombo Radyo Butuan, gipadayag ni Bombo international news correspondent Shay Kabayan nga nagpabiling mingaw ang kadalanan sa Israel tungod sa kawala’y mga tawong nanggawas.
Tambag usab kanila nga magpabilin lang sa bomb shelter higayong makadungog na og sirena nga maoy tima-ilhan sa pasulod na nga mga missiles o kaha drones nga itira sa Iran kansa mu-igo sa gintang nga 5 hangtud sa 9-minutos gikan sa ipadalang alert sa ilang mga mobile phones.
Bisan og dili siento-porsientong makaluwas sa kinabuhi ang ilang taguan nga mga bomb shelters nga anaa lang sa ilang pinuy-anan apan dakong tabang kini aron maluwas matud pa ang ilang kinabuhi.
Ang mga balay nga karaan nang gitukod maoy siguradong luwas tungod kay anaa man kini sa underground ang ilang mga bomb shelter apan ang mga bag-ong tukod na nga mga apartments, duna na’y tagsa-tagsa ka bomb shelter nga anaa lang sa ilang tagsa-tagsa ka yunit.
Nakasinati na matud pa sila karon og krisis tungod kay sukad pa niadtong Biernes, dihang nagsugod ang pagpangatake sa Iran, wala na sila’y trabaho hangtud karon.
Dili usab sila makatulog og tarong tungod ang mga pag-atake sa Iran himuon man gikan sa ala-una ngadto na sa alas-kwatro sa kaadlawon.
Wala matud pa magpasagad sa ilang trabaho ang Philippine Embassy sa Israel nga kanunay nagpagawas og advisory alang sa kaluwasan sa tanang mga Pinoy ilabina nga duna na’y mga Pinoy nga na-ospital human ana-igo sa mga tipaka sa gipangtirang drones ug missiles.
