BUTUAN CITY – Aminado si United States President Donald Trump mga wala siya malipay sa gihimo sa iyang Russian counterpart nga si President Vladimir Putin tungod sa gihimo niinin g pinakadakong aerial attack sa Ukraine.
Sa iyang pag-atubang sa mga tigbalita, gipadayag niining wala na siya masayod sa gihimo ni Putin nga nakapakurat kaniya ilabina nga padayon pa nilang gipaningkamutan ang peace talks tali sa Russia ug Ukraine apan padayon gihapon ang pagpa-ulan og mga missiles sa Russia sa bisan asang siyudad sa Ukraine nga mikalas og daghang mga tawo.
Una nang gipadayag ni Ukrainian President Volodymyr Zelensky nga ang pagpakahilom sa Washington sa bag-uhay lang nga mga pag-atake sa Russia maoy nagdasog kang Putin pagpadayon sa iyang gusto.
Sigon ni Trump, dugay na niyang ka-ila si Putin ug makasabot pa niya kini apan ang padayon niining pagtira og mga rockets ug pagpamatay sa mga tawo, wala na siya ganahi niini.
Human sa iyang pag-atubang sa mga tigbalita, nag-post og sulat si Trump sa Truth Social kondiin iyang gibutyag nga nabuang na si Putin.
