BUTUAN CITY – Nabungkag sa mga operatiba sa Police Regional Office 7 (Central Visayas) ang 15 ka mga ilegal nga pakatorya sa armas sa Brgy. Cahumayan, Danao City, lalawigan sa Cebu.
Subay kini sa direktiba ni Philippine National Police (PNP) Chief, PGen. Rommel Francisco Marbil nga pahugntan ang kampanya batuk sa mga loose firearms sa nasud.
Sigon ni Central Visayas PNP Director PBGen. Redrico Maranan, bunga kini sa ilang mga gihimong operasyon gikan niadtong Marso hangtud May 12 nga miresulta usab sa pagka-aresto sa walo ka mga indibiduwal ug pagtahan sa laing usa.
Sigon ni Maranan, dinhi naggikan ang mga armas nga gigamit sa mga kriminal, sindikato sa ilegal na droga, mga private armed groups (PAGs), New Peoples’s Army kon NPA og mga terorista.
Gawas sa nagkada-iyang mga armas, nakumpiska usab sa kapulisan ang mga gi-assemble pang mga armas ug mga piyesa niini sama sa upper ug lower receivers, barrels ug uban pang mga kagamitan.
