BUTUAN CITY – Padayong naglaum ang pamilyang Atis-Lauro nga mapa-uli na sa ilang pinuy-anan sa Purok 3, Brgy. Rojales, Carmen, Agusan del Norte ang patay’ng lawas ni Marivic Atis Lauro, 44-anyos kinsa namatay sulod sa usa ka agency sa Riyadh, Saudi Arabia.
Saysay sa iyang igsoong si Iris sa eksklusibong pakighinabi ning sibyahan, sa General Santos City matud pa ang nasayrang address sa iyang ID tungod kay taud-taud kining nakatrabaho sa maong siyudad adiser nag-abroad kondiin sa Manila matud pa kini nag-apply ug nakagawas niadtong Nobyembre ning mi-aging tuig.
Dugang pa ni Iris, daan na nilang gikatingala nganong nakagawas kini tungod kay hubakon man matud pa kini. Nasayran na lang nilang patay na kini niadtong Abril 23, duha ka adlaw gikan sa aktwal nga pagkamatay niini base na usab sa nag-viral nga video nga nagpakitang gitabang kini sa mga ka-ubanang Pinay sulod sa Englo-European Services Agency.
Naka-chat matud pa kaniya ang iyang maguwang nga gibalhin kini sa iyang orihinal nga employer ngadto sa inahan niini diin naduklan matud pa siya og usa kahigayon.
Gi-uli matud pa kini sa agency niadtong Abril 14 human nasakit dihang wala na maulii ang iyang ubo hangtud nga nag-viral gilayon ang gi-post nga video nga nagpakitang gitabang na kini.
Nakig-alayon matud pa kanila ang agency kanila apil na ang taga-munisipyo nga maoy nakig-alayon usab sa Department of Migrant Workers kon DMW ug mipasalig nga napulo ka adlaw lang ang idagan adiser kini makapa-uli.
