BUTUAN CITY – Human ang malampusong paglusad sa Provincial Joint Security Control Center sa final deployment conference ug pag-aktibo sa Provincial Committee on Kontra Bigay, andam na ang Commission on Elections kon COMELEC-Agusan del Norte alang sa May 12, 2025 National and Local Elections.
Atol sa conference, ang mga representante gikan sa COMELEC, Philippine National Police kon PNP; Armed Forces of the Philippines kon AFP, ug ang Philippine Coast Guard kon PCG, nag-iyahay og hikyad sa ilang tagsa-tagsa ka deployment plans ug logistics aron masiguro ang hapsay, luwas ug malampusong election process.
Kagahapon, malampusong nahuman ang delivery sa mga official ballots ngadto sa nagkada-iyang mga munisipyo ug syudad sa probinsya.
Sumala ni Agusan del Norte provincial election supervisor Atty. April Joy Balano, kompleto na ang mga balota ug andam na usab ang mga Automated Counting Machines kon ACM, nga ipang-apod-apod sa tanang lungsod ug dakbayan sa probinsya sa Mayo 5 ug 6, alang sa final testing ug sealing.
Gibutyag usab ni Balano nga sulod sa tulo ka adlaw gikan sa pag-abot sa balota, magpahigayon og verification ang mga election officers kauban ang mga treasurer sa ilang lugar uban sa presensya sa mga watchers o representante sa tanang kandidato ug political parties aron masiguro ang transparency.
Gipasabot usab niini nga ang verification sa mga balota buhaton pinaagi sa pag-abli sa kahon aron susihon ang sulod, ilabi na ang ballot ID, aron masiguro nga husto ang gidelivery para sa tagsa-tagsa ka mga ungsod ug dakbayan.
Subling gisiguro sa matag-deputized agency ang ilang commitment nga gamiton ang tanang available assets ug mga serbisyo aron ilang magarantiya ang malinawon, tukma, kredible ug hapsay nga eleksyon.
