BUTUAN CITY – Na-inquest na ang kaso batuk sa duha ka mga suspetsado sa pagpayuhot og illegal nga drugas, lakip niiini ang Sangguniang Kabataan kon SK chairman sa Brgy. Masao ning syudad sa Butuan ka-uban ang lain pang High Value Individual.
Sa eksklusibong pakighinabi sa Bombo Radyo Butuan, gipadayag ni PCPT Fritzcel Cubillan, ang tigpamaba sa Butuan City Police Office, nga nabalhog sa City Police Station 1 ang maong mga suspek ug gihulat na lang ang resulta sa ilang drug test.
Kahibaloan nga nasikop sa kapulisan sila Barangay Masao SK chairman alyas Kenth ingon man ang kauban niining gi-ila lamang sa pangalang si alyas Baki human nakuhaan og 170-mil pisos nga kantidad sa ginadiling druga.
Atol kini sa gilusad nga drug-buys operation kagahapon sa kaadlawon sa mga sakop sa City Drug Enforcement Unit kon CDEU ug sa pwersa sa Butuan City Police Station kon BCPS-1.
Mukabat sa 25 gramos ang nakuhang suspected shabu gikan sa mga suspek, lakip na ang Android phones, buy-bust money ug mga nagkalain-laing drug paraphernalia.
