BUTUAN CITY – Mapasigarbuhon ang 62-anyos nga lola sa Brgy. Fili, Bayugan City, Agusan del Sur tungod kay bisan pa man sa iyang taas na nga edad, nakagradwar gihapon siya sa senior high school pinaagi sa Alternative Learning System kon ALS sa Fili National High School.
Sigon ni Juanita Gida, dili lalim ang iyang kaagi tungod kay sa edad nga 29-anyos, nabyuda siya ug sulod sa 33 ka tuig niyang pagkabalo, siya lang ang nagbuhi sa iyang anak, pinaagi sa panghornal lamang, pagguna ug kung duna’y magpatrabaho kaniya aron mahinloan ilang balay. Pagkaminyo na matud pa sa iyang mga anak siya nakatutok sa pagtungha tungod kay wala na siya’y bantayan nga mga bata.
Gipasigarbo pa niya nga pipila na ka mga ALS programs ang iyang natapos sama sa business, reflexology, commercial cooking ug karon, ang Technical-Vocational and Livelihood kon TVL Track, Agri-Fishery Arts Stands.
Aminado siyang taliwa sa iyang gibating kalipay tungod kay natuman na ang iyang dugay nang pangadoy nga makatungha, mibati usab siya og dyutay nga kaguol tungod kay wala’y bisan usa sa iyang mga anak ang misaksi sa iyang pag-graduate.
Karong nakatapos na sa sekondarya, tinguha unta niyang ipadayon pa ang pagtungha sa kolehiyo apan tungod kay dili na niya makaya ang inadlaw nga plitihan, magpatabang na lang matud pa siya sa mga kadagkuan sa ALS nga hatagan siya og puhunan alang sa iyang pagsugod og negosyo, base sa iyang natapos nga mga programaa.
Tungod sa iyang kalampusan taliwa sa taas na niya og edad, nanawagan siya sa tanan nga dili himuong babag ang bisan unsa mang estado sa kinabuhi, aron makab-ot ang mga pangandoy.
