BUTUAN CITY – Gipa-andam na ni Senate President Francis “Chiz” Escudero ang mga offices sa Senado para sa impeachment trial batuk kang Vice President Sara Duterte.
Sa Direktiba ni Escudero pinaagi sa Special Order No. 2025-015 gitahasan ang Kalihim sa Senado isip Clerk of Court alayon sa Rules of Procedure sa Impeachment Trials.
Trabaho sa Clerk of Court nga mag-asiste sa Presiding Officer sa pag-atiman sa impeachment court.
Trabaho usab niining dumalahon ang non-judicial functions sa impeachment court — lakip ang pag-record ug pag-report sa mga pagtaral, pagpabilin sa court records, pagpangandam sa mga summons ug court calendar ug daghan pang uban.
Gitahasan usab ang Senate Legal Counsel nga mibarug isip Deputy Clerk diin mandato niini nga mag-draft ug mag-andam sa mga subpoenas, writs, summons, orders, resolutions, decisions, ug uban pang legal instruments.
Gawas sa Senate Legal Counsel, gitahasan usab ang Deputy Secretary for Legislation nga mobarug isip Deputy Clerk diin trabaho niini nga mag-draft og impeachment court resolutions, transcripts ug journals sa pagtaral.
Samtang trabaho usab sa Senate sergeant-at-arms nga magduso og summons, subpoenas, ug uban pang legal processes sa mandu sa Presiding Officer o sa Clerk of Court.
Ang maong kamanduan, epektibo hangtud sa pagtapos sa impeachment trial batuk kang Vice President Sara Duterte gawas kung kini bakwion o maamyendahan.
