BUTUAN CITY – Gi-akusahan ni House Majority Leader Manuel Jose “Mannix” Dalipe ang mga ka-alyado ni kanhi Pangulong Rodrigo Duterte nga gigamit matud pa niining taming ang Office of the Ombudsman (OMB) aron panimaslan ang mga miyembro sa House of Representatives nga mibotar pabor sa impeachment complaint batuk sa iyang anak nga si Vice President Sara Duterte.
Gipadayag kini ni Dalipe human mihangyo ang grupo ni Davao del Norte Rep. Pantaleon Alvarez sa Ombudsman nga suspendihon ang mga lider sa Kamara nga iyang gi-akusahang nameke sa mga public documents kalabot sa isyu sa budget insertions/blanks ngadto sa Office of the Ombudsman (OMB).
Sigon ni Dalipe, ang panawagan ni Alvarez alang sa suspensyon, usa matud pa ka desperadong pagsulay nga himuong taming ang Ombudsman aron matud pa panimaslan ang Kamara sa gipasi-atab niining nagpatuman og transparency ug accountability, bisa unsa man ang political affiliations.
Kampante matud pa siyang dili magpagamit ang Ombudsman sa mga ka-alyado ni Duterte nga mihimo matud pa og taktika aron tu-ison ang atensyon sa impeachment ni VP Sara. Gikwestiyon usab ni Dalipe ang timing sa mga aksyon nila Alvarez ug sa mga kaalyado ni Duterte kansang tumong mao ra matud pa ang pagguba sa trabaho sa Kamara.
Gipanalipdan pa niini ang proseso sa pagpalig-on sa 2025 national budget .
