BUTUAN CITY – Gibutyag sa kapulisan nga 10 ka mga tawo ang patay sa pagpamusil sa Risbergska school – usa ka adult education centre sa central Sweden, apil na ang gidudahang gunman.
Gihulagway ni Prime Minister Ulf Kristersson ang nahitabo sa Risbergska school sa Orebro, kansa 200-kilometros sa kasadpan sa capital city Stockholm, isip pinakangilngig nga mass shooting sa Swedish history.
Padayon pang gisuta sa kapulisan ang motibo sa suspetsado nga gitu-uhang nag-inusara lang paghimo sa kremin.
Una nang nagpahimangno ang kapulisan nga posibleng musaka pa ang death toll tungod kay daghan ang angol sa maong panghitabo nga gidala sa ospital kondiin upat ang gi-operahan na.
Gitu-uhan sa kapulisan nga attempted murder, arson ug aggravated weapons offence ang nahimo sa gunman ug dili matud pa terorismong binuhatan.
