BUTUAN CITY – Gikumpirma ni PLCol Jassen Tuario, provincial chief sa Criminal Investigation and Detection Group kon CIDG-Surigao del Norte nga unom ka mga Chinese nationals ang ilang nadakpan atol sa pag-serve nila sa search warrant ngadto sa mga nag-manage ug nagkontrola sa duha ka mga gold processing plants sa Brgy. Rizal ug Brgy. Mabini, Surigao City.
Sa eksklusibong pakighinabi ning sibyahan, gibutyag sa opisyal nga subject sa search warrants sila Paul Jake Castillo ug Charlie Ong alyas Sammy Ong nga at-large pa karon kinsa gikasuhan og theft ug illegal processing of minerals. Aminado ang opisyal nga gibuhian na ang nadakpang mga Chinese nationals human nakapyansa.
Nakumpiska gikan sa maong mga processing plants ang mga gamit sa gold processing, mga chemicals ug mga raw gold materials nga gikostudiya na sa Mines and Geo-Sciences Bureau kon MGB aron madetermina ang gold content ug ang presyo niini.
Gikumpirma usab sa opisyal nga duna’y gipakitang ID ug passports ang nadakpang mga Chinese nationals kinsa nanghimakak nga nagmina sila base sa interpreter tungod kay turista matud pa sila.
Apan atol sa operasyon, nakasuot sila og butas didto mismo sa mining site ug migawas pa sa ilang imbestigasyon nga daghan pang mga Chinese nationals ang nalambigit sa maong mining operation.
Gika-ingong mu-abot matud pa 8.5-ektarya ang area sa gikabot nga duha ka bukid ilabina sa Brgy. Mabini, Surigao City.
