BUTUAN CITY – Hingpit nang milingkod si Most Rev. Ruben Labajo, ang bag-ong Obispo sa bag-uhay lang namugna nga Diocese of Prosperidad human sa gihimong Canonical Possession and Solemn Installation kaniya kaganinang buntag sa St. Michael the Archangel Cathedral sa lungsod sa Prosperidad, lalawigan sa Agusan Del Sur.
Nagsilbing installing prelate si Most Rev. Charles John Brown, ang Papal Nuncio dinhi sa Pilipinas Philippines. Ang instolasyon, usa ka mahinungdanong panghitabo sa kasaysayan sa Diocese of Butuan tungod kay ang bag-ong Diocese of Prosperidad, gimugna man gikan sa nagtunhay nga diocese nga nag-cover sa kinatibuk-ang lalawigan sa Agusan del Sur.
Init siyang gisugat sa mga civic leaders sa maong lalawigan pinaagi sa ilang civic reception, kondiin gidawat ug gi-ila sa mga lideres ang papel sa Diocesan kinsa maoy magbantay sa komunidad sa Katoliko sa kinatibuk-ang lalawigan sa Agusan del Sur. Sa iyang pagpamulong, gipadayag ni Bishop Labajo nga naghatag kini kaniya og kalipay ug dakong garbo.
Aminado siyang wala siya mangandoy nga ma-assign dinhi sa Mindanao tungod sa mga negatibong balita nga duna’y mga pari nga gipangdagit ug duna pa’y giputlan og ulo. Apan dihang gihatag na kaniya ang assignment, wala na niya kini atrasi ug nawala ang iyang kabalaka human nakita ang init nga pagdawat sa mga taga-Agusan del Norte ug Agusan del Sur kaniya.
Kagahapon sa iyang pag-abot sa Agusan del Norte, nag-courtesy visit pa si Bishop Labajo kang Diocese of Butuan Bishop Most Reverend Cosme Damian Almedilla.
