BUTUAN CITY -Gipasidan-an ni kanhi Pangulo Rodrigo Roa Duterte ang administrasyong Marcos nga mahimo niyang isugyot sa publiko nga dili mubayad og buhis kung dili mahatagan og katin-awan sa administrasyon ang mga deliberasyon alang sa reserve funds tungod kay masayang lamang ang gibayad nga buhis sa publiko, ilabina kung dili sila masayod kung asa gamiton ang ilang kwarta.
Dili usab matud pa insakto nga biyaan na lang nga blangko ang pipila ka mga parte sa budget tungod kay wala kini naha-uyon sa balaod ilabina kung ang maong budget, aprubado sa pinakataas nga buhatan sa Pilipinas.
Dugang ni Duterte, mahimo pang sumbanan sa mga iregularidad kung makapili ang maong buhatan og balor nga gusto nilang idugang sa panudlanan isip reserba lamang.
Una nang nagbahad ang kanhi Presidente nga mamahimong mabilanggo ang nagpasiugda sa nasangpit nga lakang, ug gisaad niining dili kini makalusot sa mata sa balaod, rason nga gi-aghat niini ang mga opisyal nga dili sulayan ang pagbutang og reserba nga pundo.
