BUTUAN CITY – Lauman ang usbaw sa suhulan sa mga empleyado sa probinsiyal nga panggamhanan sa Agusan Del Norte tungod sa pagkahimo niini nga 1st class gikan sa klasipikasyon nga 3rd class province.
Kini ang gikumpirma ni Edgar Plarca, Community Affairs Officer Chief sa Agusan Del Norte sa pakighinabi ning sibyahan.
Sumala pa niini nga modawat na ang mga empleyado og standard salary base sa klasipikasyon niini nga 1st class.
Una nang gipasalamatan sa opisyal ang tanang katawhan sa Agusan Del Norte sa ilang suporta pinaagi sa pagbayad sa buluhisan.
Lakip na ang paningkamot sa mga empleyado og mga opisyales rasong nakab-ot ang maong klasipikasyon. Gipasabot pa niini nga nakuha ang maong kalampusan human usab nga nakab-ot ang average annual income nga uno bilyones og 500-mil pesos.
Nagpasabot lang kini sa grabeng paglambo sa probinsiya nga dayag nga makita sa nagkadaghan nga pamatigayon sa Agusan Del Norte.
Nasayrang base sa Provincial Resolution No. 590-2024 nga gipangamahanan ni Bise-Gobernador Enrico R. Corvera Giila na isip 1st class nga probinsya ang Agusan del Norte epektibo sa Enero 1, 2025.
