Pila ka oras human nahagsa ang eroplano sa South Korea, dunay eroplano na usab sa Canada nga nagkayu samtang pa-landing

BUTUAN CITY – Pila ka oras human ang pagkahagsa sa eroplano sa South Korea nga mipatay sa 179 ka mga sakay niini, laing Air Canada Express plane ang nagkayu sa Halifax Stanfield International Airport sa Goffs, Nova Scotia, Canada.

Hinoon walay casualty nga gitaho diin ang tanang pasahero og crew members ang na-evacuate nga luwas.

Ang maong Airlines flight, nga miabot sa St John’s, Newfoundland, pakyas nga naka-deploy og tarung sa landing gear rasong nagtakilid kini.

Ang maong abyon dunay 73 ka pasahero diin ang tanan nakagawas nga luwas sulod sa duha ka minutos og gidala sa hangar alang sa medical assessment diin minor injuries lang ang nahiagum.

Imbestigahan pa sa otoridad ang hinungdan sa pagpalyar sa landing gear niini.